ଟାଟା ଷ୍ଟିଲ୍‌‌ର ବ୍ରାହ୍ମଣୀପାଳ ଫେରୋ ଆଲଏଜ୍ ପ୍ଲାଣ୍ଟ୍‌‌କୁ ‘କଳିଙ୍ଗ ପରିବେଶ ଶ୍ରେଷ୍ଠତା ଜାତୀୟ ପୁରସ୍କାର’

ଭୁବନେଶ୍ୱର, ଜୁନ୍ ୨୨, ୨୦୨୬: ସ୍ଥାୟୀ ଖଣିଜ ଉତ୍ତୋଳନ ଏବଂ ପରିବେଶ ଅନୁକୂଳ ଶିଳ୍ପ ଅଭ୍ୟାସ ପ୍ରତି ପ୍ରତିବଦ୍ଧତା ପାଇଁ ଟାଟା ଷ୍ଟିଲ୍ ପୁଣି ଥରେ ଜାତୀୟସ୍ତରରେ ସମ୍ମାନିତ ହୋଇଛି। କମ୍ପାନୀର ଫେରୋ ଆଲଏଜ୍ ଆଣ୍ଡ୍ ମିନେରାଲ୍ସ ଡିଭିଜନ୍ (ଏଫ୍‌ଏଏମ୍‌ଡି) ଅଧୀନରେ ବ୍ରାହ୍ମଣୀପାଳଠାରେ ପରିଚାଳିତ ଫେରୋ ଆଲଏଜ୍ ପ୍ଲାଣ୍ଟ୍ (ଏଫ୍‌ଏପି)କୁ ପ୍ରତିଷ୍ଠିତ ‘କଳିଙ୍ଗ ପରିବେଶ ଶ୍ରେଷ୍ଠତା ଜାତୀୟ ପୁରସ୍କାର-୨୦୨୫’ ପ୍ରଦାନ କରାଯାଇଛି।
୨୦୨୫ରେ ପରିବେଶ ପରିଚାଳନା କ୍ଷେତ୍ରରେ ଉଲ୍ଲେଖନୀୟ ପ୍ରଦର୍ଶନ ପାଇଁ କେନ୍ଦୁଝର ଜିଲ୍ଲାରେ ଥିବା ଏହି ପ୍ଲାଣ୍ଟ୍‌‌କୁ ‘ଫାଇଭ୍ ଷ୍ଟାର’ ବର୍ଗରେ ସମ୍ମାନିତ କରାଯାଇଛି। ଏହି ସମାରୋହରେ ବ୍ରାହ୍ମଣୀପାଳ ଫେରୋ ଆଲଏଜ୍ ପ୍ଲାଣ୍ଟ୍‌‌ର ମୁଖ୍ୟ ଆଦର୍ଶ ଅଗ୍ରୱାଲ କମ୍ପାନୀ ପକ୍ଷରୁ ଏହି ପୁରସ୍କାର ଗ୍ରହଣ କରିଛନ୍ତି।
ଭୁବନେଶ୍ୱରର ଏକ ହୋଟେଲରେ ‘ଇନଷ୍ଟିଚ୍ୟୁଟ୍ ଅଫ୍ କ୍ୱାଲିଟି ଆଣ୍ଡ୍ ଏନଭାଇରନମେଣ୍ଟ ମ୍ୟାନେଜମେଣ୍ଟ ସର୍ଭିସେସ୍‌’ (ଆଇକ୍ୟୁଇଏମ୍‌ଏସ୍‌) ଦ୍ୱାରା ଆୟୋଜିତ ୧୧ତମ ପରିବେଶ, ଶକ୍ତି ଏବଂ ଜଳବାୟୁ ପରିବର୍ତ୍ତନ ଜାତୀୟ ସମ୍ମିଳନୀ–୨୦୨୬ ଅବସରରେ ଏହି ପୁରସ୍କାର ପ୍ରଦାନ କରାଯାଇଛି। ପ୍ରମୁଖ ଶିଳ୍ପ ସଂଗଠନ ଏବଂ ପରିବେଶ ବିଶେଷଜ୍ଞମାନଙ୍କ ସହଯୋଗରେ ଆୟୋଜିତ ଏହି ସମ୍ମିଳନୀରେ ପରିବେଶର ସ୍ଥାୟିତ୍ୱ, ଶକ୍ତି ଦକ୍ଷତା ଏବଂ ଜଳବାୟୁ ସୁରକ୍ଷା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଶ୍ରେଷ୍ଠ ପ୍ରଦର୍ଶନକାରୀ ସଂସ୍ଥାଗୁଡ଼ିକୁ ସମ୍ମାନିତ କରାଯାଇଥିଲା।
ପରିଚାଳନା କ୍ଷେତ୍ରରେ ସ୍ଥାୟିତ୍ୱ, ସମ୍ପଦର ସଦୁପଯୋଗ, ପରିବେଶ ସୁରକ୍ଷା ଏବଂ ଶକ୍ତି ସଂରକ୍ଷଣ ପ୍ରତି ଟାଟା ଷ୍ଟିଲ୍‌‌ର ନିରନ୍ତର ପ୍ରୟାସ ପାଇଁ ଟାଟା ଷ୍ଟିଲକୁ ଏହି ସମ୍ମାନ ମିଳିଛି। ଏହି ସମ୍ମାନ କମ୍ପାନୀକୁ ଦାୟିତ୍ୱବାନ ପରିବେଶ ଅଭ୍ୟାସ ଜାରି ରଖିବା ପାଇଁ ପ୍ରେରଣା ଦେବା ସହ ଏକ ସବୁଜ ଏବଂ ସ୍ଥାୟୀ ଭବିଷ୍ୟତ ଗଠନ ଦିଗରେ କମ୍ପାନୀର ଉଦ୍ୟମକୁ ଆହୁରି ସୁଦୃଢ଼ କରିବ।