ଭୁବନେଶ୍ୱର: ଟାଟା ପାୱାର ଏବଂ ଓଡ଼ିଶା ସରକାରଙ୍କ ଏକ ଯୌଥ ଉଦ୍ୟୋଗ ଟିପି ସେଂଟ୍ରାଲ ଓଡିଶା ଡିଷ୍ଟ୍ରିବ୍ୟୁସନ୍ ଲିମିଟେଡ୍ (ଟିପିସିଓଡିଏଲ୍), ପକ୍ଷରୁ ଓଡ଼ିଶା ଦିବସ ଉତ୍ସାହ ଓ ଉଲ୍ଲାସର ସହିତ ପାଳିତ ହୋଇଛି। ଏହି ଅବସରରେ ରାଜ୍ୟର ସମୃଦ୍ଧ କଳା, ସଂସ୍କୃତି, ଐତିହ୍ୟ ଓ ପାରମ୍ପରାକୁ ସ୍ମରଣ କରାଯିବା ସହ, ଓଡ଼ିଶାକୁ ଏକ ସ୍ୱତନ୍ତ୍ର ଭାଷାଭିତ୍ତିକ ରାଜ୍ୟ ଭାବେ ଗଠନରେ ବଦାନ୍ୟତା ପ୍ରତିପାଦନ କରିଥିବା ନେତୃତ୍ୱଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଥିଲା।
କାର୍ଯ୍ୟକ୍ରମଟି ଦୀପ ପ୍ରଜ୍ୱଳନ ମାଧ୍ୟମରେ ଆରମ୍ଭ ହୋଇଥିଲା, ଏହାପରେ ରାଜ୍ଯ ସଙ୍ଗୀତ “ବନ୍ଦେ ଉତ୍କଳ ଜନନୀ”ର ସମୁହ ଗାୟନ ଦ୍ୱାରା ସମଗ୍ର ପରିବେଶ ଗୌରବ ଓ ଏକତାର ଭାବନାରେ ଭରିଯାଇଥିଲା।
ଟିପିସିଓଡିଏଲ୍ ପକ୍ଷରୁ ଏପ୍ରିଲ ୧ ରୁ ୧୪ ତାରିଖ ପର୍ଯ୍ୟନ୍ତ “ଓଡ଼ିଆ ପକ୍ଷ” ପାଳନ କରାଯାଉଛି, ଯାହାର ଉଦ୍ଦେଶ୍ୟ ହେଲା କର୍ମଚାରୀ ଓ ସାଧାରଣ ଲୋକଙ୍କ ମଧ୍ୟରେ ଓଡ଼ିଆ ଭାଷା, ସଂସ୍କୃତି ଓ ପାରମ୍ପରା ପ୍ରତି ସଚେତନତା ବୃଦ୍ଧି କରିବା।
ଏହି ଅବସରରେ ଟିପିସିଓଡିଏଲ୍ ର ସିଇଓ ଶ୍ରୀ ଅରଭିନ୍ଦ ସିଂହ କହିଥିଲେ, “ଓଡ଼ିଶା ଦିବସ ପାଳନ ଆମ ସମସ୍ତଙ୍କ ପାଇଁ ଗର୍ବ ଓ ଗୌରବର ମୁହୂର୍ତ୍ତ। ଏହା ଆମକୁ ସେହି ମହାନ ମହାପୁରୁଷ ଓ ନେତୃତ୍ଵଙ୍କ ସାହସ, ଦୃଷ୍ଟିକୋଣ ଓ ଦୃଢ଼ ସଙ୍କଳ୍ପକୁ ସ୍ମରଣ କରାଏ, ଯେଉଁମାନେ ସ୍ବତନ୍ତ୍ର ପ୍ରଦେଶ ଭାବେ ଓଡ଼ିଶାକୁ ଆକାର ଦେବାରେ ଯୋଗଦାନ କରିଥିଲେ। ଟିପିସିଓଡିଏଲ୍ ପକ୍ଷରୁ ଆମେ ଏହି ଐତିହ୍ୟକୁ ଆଗକୁ ନେବା ପାଇଁ ପ୍ରତିବଦ୍ଧ। ନିର୍ଭରଯୋଗ୍ୟ ବିଦ୍ୟୁତ୍ ସେବା ଯୋଗାଣ ମାଧ୍ୟମରେ ରାଜ୍ୟର ସମଗ୍ର ଉନ୍ନତିରେ ଅଂଶୀଦାର ହେବାକୁ ଆମର ପ୍ରୟାସ ଜାରି ରହିବ।”
ଏହି କାର୍ଯ୍ୟକ୍ରମରେ କର୍ମଚାରୀମାନଙ୍କର ଉତ୍ସାହଭରା ଅଂଶଗ୍ରହଣ ଦେଖିବାକୁ ମିଳିଥିଲା, ଯାହା ଓଡ଼ିଶାର ଗୌରବମୟ ଐତିହ୍ୟ ପ୍ରତି ସେମାନଙ୍କର ଗଭୀର ସମ୍ମାନକୁ ପ୍ରକାଶ କରୁଛି। ସିଇଓ ଶ୍ରୀ ଅରଭିନ୍ଦ ସିଂହଙ୍କ ସହିତ ଅନ୍ୟ ବରିଷ୍ଠ ଅଧିକାରୀମାନେ ଓ ଅନ୍ୟାନ୍ୟ କର୍ମଚାରୀମାନେ ଏହି ଅବସରରେ ଉପସ୍ଥିତ ରହିଥିଲେ।